jueves, 25 de julio de 2013

Varón

  ¡Me giedin los hombris
      que son medio jembras!

      Cien vecis te ije
      que no se lo dieras;
que al chiquín lo jacían marica
      las gentis aquellas.  .

Ahora ya lo vide, y a mi no me mandis
      más vecis que güelva.

      Te largas tú a velo,
      que pué que no creas
que tu cuerpo ha parío aquel mozo, 
ni que lo cebasti Con tu lechi mesma,
ni que tieni metía en la entraña
      sangri de mis venas.

      N'amas de mimarros
      y delicaezas
      se ha queao lo mesmo que un jilo
paliúcho y sin chispa de juerza.

      Cá instanti se lava,
      cá inslanti se peina,
      cá instanti se múa
      toa la vestimenta,
y se encrespa los pelos con jierros
      que se lo retuestan,
 en los dientis se da con boticas
 de unos cacharrinos que tieni en la mesa,
 y remoja el moquero con pringuis
       n'amás pa que güela.

       ¡Giedi a señorita
       dendi media legua!

Se levanta a las nuevi corrías
y a las doci lo menos se acuesta.

       ¡Va a ponersi pochu
si acotina de aquella manera!

¡Güeno está pa mandalo a bellotas,
pa ayualmi a escuajal en la jesa,
pa jacel un carguju de tarmas
       y  traélo a cuestas,
u pa estalsi cavando canchális
dende que amaneci jasta que escureza!

Los muchachos de acá me esconfio
       que mos lo apedrean
cuantis venga jaciendo pinturas
u jablando de aquella manera,
y verás cómo el mozo no tieni
       ni agallas ni juerza
pa el primero que quiera moflarsi
       rompeli la jeta.

       Ya no dici padri,
       ni madri, ni agüela.

"Mi papá, mi mamá, mi abuelita..."
       así chalrotea,
como si el mocoso juesi un señoruco
       de los de nacencia,
ni mienta del pueblo, ni jace otro oficio
        que dil a una escuela
y palral e bobás que allí aprendi,
que pa ná le sirvin cuantis que se venga.

Pa sabel  sus saberis le ije:
       "Sácame la cuenta
del aceiti que hogaño mos toca
del lagal po la parti que es nuestra.

Se maquilan sesenta cuartillos
      p'acá parti entera,
y nosotros tenemos, ya sabis,
      una media tercia
que tu madre hereó de una quinta
que tenía su agüela Teresa.

 ¡Ya ves tú que se jaci en un verbo!
      Sesenta la entera,
      doci pa la quinta,
      cuatru pa la tercia,
quita dos pa una media, y resultan
      dos pa la otra media.

Pus el mozu empringó tres papelis
      de rayas y letras
      y pa ensenrearsi
      de aquella maeja
ijo que el aceiti que a mi me tocaba
era "pi menus erre",  ¿te enteras?

      ¡Pus pués dil jacindu
      las sopas con ella!

      ¿Y esos son saberis?
      ¡Esas son fachendas!

 No le quise mental del guarrapo
      ni icile siquiera
que hogañazo vendimos el churru
pa compral un cachuju de tierra.

      ¡Allí no se jabla

de esas cosas ni en ellas se piensa!

N'amás que se jaci comel confituras
      melcal vestimentas,
      dirse a los cafesis,
      dirse a las comedias
y palral de bobas que no valin
       ni siquá una perra.

¡Jolgacián como el nuestro muchacho
no va a habelo, si aquí no se almienda!

Yo no lo distingo de otros señorinos
que con él se ajuntan y jolgacianean.

       ¡Son como maricas¡
       ¡Júy, qué vestimentas!
       Ves una presona
por detrás, en la calli, tan tiesa
y endi lejus no sabis de cierto
       si es macho u es jembra.

       Güelen a lo mesmu
       como las ovejas,
y p'aquí no es asín, que cá cosa
       güele a su manera:
güeli a macho la carni de hombri
y la carni de jembra da a jembra.

Hay que dil a buscar al muchacho
       cuantis que se puea,
y le dicis a aquellos señoris
que esu no quita pa que se agraeza,
pero que a su padri le jaci ya falta,
       y asín se la enreas.

No lo quió jolgacián, aunque muchos
       saberis trujiera.

Y no es esu solu lo que a mí me enrita,
que otras cosas me jacin más mella...
Hay que dil a buscalo cá y cuando,
       que venga, que venga,
porque mira,  me giedin los hombris
       que son medio jembras.
 
                                 Gabriel Y Galán 

domingo, 21 de julio de 2013

La Gedihonda

             Asín jablaba la madri
          y asín el hijo jablaba
          el hijo ajogao de aginos,                
          la madri ajogá de lágrimas,
          él jechao y ella encogía
          a la vera de la cama.
           -Si sigues asín penando,
          te mueris, hijo del alma,
          y si te casas con ella
          te jundis y a tós mos matas.
          ¿Ondi tienis la cabeza,
          ondí tienis las entrañas
          que no se te jacin migas
          de vel las jielis que pasa
          tu padri, que tó lo sabi
          manque no te dicí nada?
           ¿Ondí tienis tú los ojos
          pa no vel en lo que paras
          cuantis que logrí enrealtí
          la serpiente que te engaña?
          Pa ti no es eso apareníl,
          ni ella con tu genti encaja,
          ni a ti, Gelipe, te salí
          esi rumbo que ella gasta.
          Y entávia más malu que eso
          es que tiení mala fama,
          y a tós los hombris los quieri
          y como a ti los ¡alaga,
          y acuerdati tú, Gelípí,
          que pol jacel cosas malas,
          jasta el alcaldi y el cura
          quisun del pueblo aventala.
            Una mujel que ha venio
          de alguna ciudá mundana,
           ¡Qué habrá jecho pa estal sola
          sin naide de la su casta!...
           ¡Qué habrá jecho! lo que dicin
          que jaci aquí: cosas malas,
          que e mi me cuesta decilas,
          pero a ella jacelas, nada.
            Bien sabis tú que la genti
          la "Gedihonda" la llama,
          porque dícin tós los hombrís
          que endi lejos jiedi a mala.
            Y tú cieguinu a querela,
          y ella jaciendote cara
          pa empicarti a su persona
          y calentarti la entraña.
            ¡Y bien que lo ha conseguio!
            ¡Y bien la genti lo jabla!
            ¡Y bien se agina tu madri
            por ti, Gelipi del alma!
             Dicin que bebel te ha jecho
            de una bebía mu mala
            que a los hombris entontecí
            pa hacelos querel sin gana.
             Y asín debí sel, Gelipi,
            Gelipí de mis entrañas,
            que tú eras bueno artinantis
          y nunca jielís nos dabas,
          y na del mundo sabías,
          y siempre quietino en casa,
          jasta te daba vergüenza
          si de novias te jablaban.
            Y jací un año corrío
          que eris otro, hijo del alma,
          ajuyis de andi tu madri,
          duermis pocu, no trabajas,
          comes como un pajarino
          y ya solino te encamas.
           To jué porque te empicaste
          a esa serpiente mundana
          con la que dicí la gentí
          que aunque te matin te casas.
           Imí sí es cierto, Gelipi,
          pa yo morilme de ansia
          pa que se ajogui tu padri,
          pa pue se aflija tu hermana,
          pa dicilti que te jundis
          y deshonras a tu casta,
          porque esa mujel perdía
          endi lejus jiedi a mala.
                                     
                            II

          Asín jablaba la madri,
          y el hijo asín contestaba:
           Madri, me quieri y la quiero,
          manque dicin que es mundana.
           Ni pueo ejala a ella
          ni a usté quiero yo matala...
           ¡Ejalmi moril de queo
          y queáis iguales dambas!... 
 
 
                               Gabriel Y Galán