El desconcierto

Improvisación Anda, que güena t'espera; güeno está tu padre, güeno p'arrimate tres zurrios y no dejate il p'al pueblo enjamás. ¿Onde has andao? Dime: ¿Qué diablos t'has jecho töita la noche de Dió sin acudir, y sabiendo que tós aquí t'aguardaban como al santo venimiento muertos de jambre? ¡Qué corcio!; yo estuve en el desconcierto, es deci, yo estuve juera, que los que estaban por drento eran tós los señoracos, la gente gorda del pueblo. ¡Vaya mozas peripuestas! ¡Vaya jembras de lo güeno! ¡Vaya'quel Marcos Reöndo qu'estaba que pa coméselo! Pos ¿y aquel del organillo? ¡no era naide con los deos! Asín son las juergas, madre, de los señores der pueblo, asin da gusto, ¡qué contrí!, y no como aquí jacemos, siempre empinando la bota, cantando siempre lo mesmo. Aquellos eran cantares Con tó lo suyo; por cierto qu'a mi me páece mentira qu'aquel mocino tan nuevo, tan delgainino, cantara tan juerte y con tanto genio. ¡Vaya un vozarrón, mi madre!, retumbaba com'un trueno, y endispués s'iba apagando tiritando en el galguero, jaciendo unos gorgoritos, jormando un feligraneo, apretando y aflojando, bajando y después subiendo, destirajandó la copla y queándose un momento con un són d'esos mu juertes, que los llaman dós de pecho, lo mesmito que los micales jacen parás en el cielo. ¡Mecachi en dies, vaya un tío! ¿Onde l'enseñarán eso? Pa mi que no es en España, porque en España yo creo que no l'enseñan a uno na más qu'a cantá flamenco. Lo qu'a mi me da coraje es qu'a lo mejó no entiendo la letra de las tonás que se canta con más genio. Cúchili, fáchili, mochi ¡Anda, verigua tú eso!, Pos asín se las gastaban las coplas del desconcierto. Lo qu'es p'al cante no hay otro, no pué ser que llegue haberlo como ese Marcos, tan flaco, tal delgainino, tan tieso, que canta más qu'una máquina cantaora, ¡ya lo creo! Y pa cuestión de la música, pa dal de prisa a los deos no pué habel otro en el mundo que maneje el estrumento mejó, ni con tanto garbo, con más gracia y más salero como ese señor Echániz qu'es un tío de cuerpo entero. Y ya lo sabes tó, madre, tó lo que pasa pol pueblo, y da gracias a las gracias que s'acabó el desconcierto, que si no, manque m'hubiera padre escachurrao los sesos endispués, esta presona no güerve pal rastrojeo, ni güerve con los avios, ni güerve con los aperos, y os saldrían telarañas en el estógamo mesmo. ¡Vivan los Marcos Reöndos! ¡Vivan los músicos güenos! ¡Vivan las caras bonitas de las muchachas del pueblo! Y dile a padre que venga, que no m'importa un pimiento que m'atice tres zurrios y me retuerza el pescuezo. Luis Chamizo

La cartilla del campesinu

Si quierih ser campusino
prencipiaras con la siembra
siguiendu tó el procesu
jasta que llegui la siega
y estar en está dispuestu
pa dirti al cortí con juerza.

Pus, por lo menus tendras
que dir de ataor a ella
jaciendu ñus con el balagu
atandu la mies mu prieta
trujiendu agua a los hombris
de argún pozu que este cerca.

Tamien iras a l'era
y allí; montau en el trillu
jaras roangas enteras
jasta que'l granu y la paja
de tantu habel siu cortaus
andin, ca unu pol su cuenta.

Endispues bieni la limpia
si el vientu mos acompaña
aventaremus la parba
con los liendrus, con las palas
pa que asin de esta manera
se separin granu y paja.

El granu hemus de trael
en costalis aqui a casa
y vaciarlu en la trojí;
o meterlu aondi mos caba
esperandu a poel vendelu
a quien mejor mos lo paga

                                David

El Desafío

 En la izquierda la guitarra
la navaja en la derecha,
terciada la manta al hombro,
la faja encarnada, suelta,
la actitud provocativa,
la mirada descompuesta,
roja de rabia la cara,
ronca la voz y algo trémula,
así apostrofaba el mozo
más rumboso de la aldea
a cuatro o seis rondadores
que invadieron la calleja
donde el mozo le cantaba
cantares a su morenaz
  ¡Me caso en Reus! Los majos
que asín de mí se moflean
jechin el paso p'alanti
como el que jabla lo jecha.
 Si alguno tiene asaúras
y halbeliá más que lengua,
jala p'alanti ahora mesmo,
que, al que de mi se grojea
sé yo jaceli una raya
pa embajo de alguna teta.
 Sos tengo bien alvertío,
por ajuyir de quimeras,
que cuando yo jechí rondas
a la vera de esta reja
calli la boca quien pasi
pa que le salga la cuenta
y jaga que no ma visto,
y andi agúo y no se güelva,
que esta calli es pa mi solo
dendi que Dios anocheza.
Si en esi corru hay alguno
que quié que le dé en la jeta
y jaga un bochí y lo entierri
al mesmo pie de esta reja
pa cantli luego encima
lo que él cantali quisiera
a una mujel que le ajuyi
y a cá minuto lo avienta.
 Si quié dil de golpe al bochí
eji el corru y acá venga,
y si el humol no le ayúa
y el miëdo le jormiguea,
ayuáli los del corru,
que pa tos acaso tenga.
  Jala p'lanti los cinco,
que aunque sin naide me vea,
enjamás he rejilao
ampié la ventana ésta!"
 Así dijo el bravo mozo,
Y a saltos como una fiera
lanzóse hacia los del grupo,
que, sin grande resistencia,
dejaron en un momento
despejada la calleja.
 Tornó el mozo a la ventana
de la muchacha morena
y la guitarra pulsando
hirió con rabia las cuerdas,
y al aire lanzó esta, copla
con la voz un poco trémula:
 "No le jurguis al león
que anda alreor de la jembra,
ni te enredis con el hombri
que canta al pie de una reja

Gabriel y Galán